Кыргызстандарт

Россия Федерациясынын Нижний Новгород шаарында  стандартташтыруу, метрология жана сертификация боюнча Мамлекеттер Аралык Кеңештин 67-отуруму болуп өттү. Бул кеңеш аталган тармактарда макулдашылган саясат жүргүзүү жөнүндөгү келишимге катышкан мамлекеттердин кеңеши болуп саналат.

Отурумга стандартташтыруу, метрология, шайкештикти баалоо жана аккредитация боюнча сегиз улуттук органдын делегациялары катышты: Азербайжан Республикасы, Армения Республикасы, Беларусь Республикасы, Казакстан Республикасы, Кыргыз Республикасы, Россия Федерациясы, Тажикстан Республикасы жана Өзбекстан Республикасы. Ошондой эле Кеңештин ишине КМШ Аткаруу комитетинин жана Стандарттар боюнча бюронун өкүлдөрү катышты. Күн тартибинде стандартташтыруу, метрология, аккредитация жана шайкештикти баалоо чөйрөсүндөгү ишмердүүлүктү өнүктүрүүгө жана шайкеш келтирүүгө багытталган 30дан ашык актуалдуу маселе каралды. Продукциянын сапатын жана атаандаштыкка жөндөмдүүлүгүн жогорулатууга, ошондой эле илимий-техникалык кызматташтыкты жана Макулдашууга катышкан мамлекеттердин ортосундагы соода-экономикалык байланыштарды чыңдоого өзгөчө көңүл бурулду.

Отурумдун негизги чечимдеринин бири болуп Мамлекеттер Аралык Кеңештин төрагасын эки жылдык мөөнөткө шайлоо болду. Процедуранын эрежелерине жана Кеңештин чечимине ылайык, бул кызматка Кыргыз Республикасынын Экономика жана коммерция министрлигине караштуу Стандартташтыруу жана метрология борборунун директору Нурматов Болотбек Асанович бир добуштан шайланды.

Отурумдун жыйынтыгында мамлекеттер аралык стандартташтыруу системасын мындан ары өркүндөтүүгө, сапат инфраструктурасын өнүктүрүүгө, ошондой эле КМШ мейкиндигинде өлчөөлөрдүн бирдейлигин жана шайкештикти баалоонун натыйжаларын таанууну камсыз кылууга багытталган макулдашылган чечимдер кабыл алынды. Бул отурум катышуучу мамлекеттердин өз ара аракеттенүүсүнүн жогорку деңгээлин жана тереңдетүүгө умтулуусун тастыктады.